తోచినదేదో, తెలిసినదేదో

    ఎంత చిక్కని వన్నెలె యీ నీ ఆకులని మెచ్చి     ఎంత చక్కని చుక్కలె  నీ విరులని పొగడి     వంతలన్ని మరచి తరు శ్రీ లూసులాడినట్లు     అంతరంగపు బంగరుటూహల పంచికొన్నట్లు!!

    చిత్రము కాదె చిత్రము లోని వేణు రవమ్ముల     కాత్మ మరచి ఆడి పాడునీ  మీరా తను లత!     చిత్రమదేమి,హ్రృత్శతపత్రమ్మున క్రృష్ణ నామా     ద్భుత రూపుల వేనవేలు వ్రాసిన సుధ్ధ్యానికిన్

 గోకులమున ధవళ,కపిల,బాలారుణాది                 వత్సములట్లు  సకల శాస్త్రాభ్యాస లగ్న గురుపీఠ శిష్య   కిశోరములట్లు/  ఆ కదంబవన నిరీక్షిత దేవతా గణ   మనోల్లాసమట్లు/  శ్రీ కళల విలసిల్లె సుమవాటి సుగంధ రాగ బంధురమై!!

               అంతస్తు లైదిట అమరె,                లతాంతపు జిల్గుటందాలు!                ఏ తావుల ఠీవియొ ఇది                నెత్తావుల కోమల విరి!!                               ***

                శైల  బాల ఫాలనేత్రు తలపుల                 బాల సీత రామచంద్రు గుణముల                 నీల నామ శ్యామక్రృష్ణు పలుకుల                 మల్లియల సురభుల తెలియన్!!

             రెండు పూర్ణముల ఒక్కటీ ద్వయి,              నిండుదనములె రెండు సాములు!              చండ తరణియు,సుకాంతి రీతి              మెండు ప్రేమల పితరులై,నిత్యులై!!

             అమ్మ ఒడిలో గారాల పట్టినై  నేను,             "మా అమ్మ",అని దిటవుగ నిల్చి అన్న!              పుటలలో లోకముల నేలు రాముడు,              స్మృతి పటములో అమ్మే మా దైవమై!!    

        క్షీర నీరముల త్రుటిని సునాయాసముగ         వేరు చేయు విద్యకాది గురువులు వీరట!         మరి మరి చదువుల,బోధలనైన, మాకు         ఎరుక రాదె,కల్ల నిజముల గురుతులన్!! 

       నదులై పారెడు ఈ నీటి ఉరవడి        కదలని రాతి దీవుల గడపలు        కదలెడు హంసదీవుల సొగసులు        ఏది కాదనక అన్నిటి కాకరమై!!

వదనముత్సిక్త కారుణ్య పయోనిధి, తనువేమొ లావణ్యవల్లి / పద్మాంచితాభయవరదచతుష్పాణి,మణిభూషా ప్రోల్లసత్కంఠి/ హ్రృది హరిశబ్ద యజ్ఞవేది,వసనము సస్య శాద్వల సురోచి/ విధు  సోదరి, లక్ష్మికి, జగదానంద సంధాయికివె, హ్రృదంజలుల్!!

    రేఖామాత్రమైన ఋజు పథముల తప్పని వారు     పాకారి వినుత చండ మార్తాండ రణ విక్రములు     ఈ కాసార రిక్త స్థలి వీతాసువులై కూలిరహో     మా కాధారము తొల్లిటి ధర్మవర్తనమె యిత్తఱిన్!!

         మనముల ముద్రితమై కాలపు టలలన్          పెను స్మ్రృతి పథపు పలు జిలుగు దారుల          కను మరుగైన జ్ఞాపకముల వెలిగించ          అనువౌ జీవన దర్శిని, ఔర!ఈ కెమెరా!!                                 *****           (గుర్తున్న సంఘటనల జ్ఞాపకాలు,            కనుచూపు  మేరలోవే, అని!)